خمس محطات

الفرق بين الثائر بتاع التحرير .... و القابض بتاع العباسية خمس محطات
دا لو استطاع قابض العباسية انه يتخلي عن خصائصه الكنبية البحتة و يتمشي يركب من محطة الدمرداش
اما ثائر التحرير .. فا كان بياخدها مشي علي رجله و يتضرب بقنابل الغاز و الرصاص المطاطي و بيكمل و بيوصل
مافتكرش ان في حد من اللي نزلوا ميدان العباسية ينادوا (شرطة و شعب و جيش ايد واحدة ) او ( اللي يحب مصر مايخربش مصر) انه نزل و شم ريحة قنبلة الغاز حتي من بعيد .. او يكون بعين واحدة ولا واخدله 40-50 بلية خرطوش في جسمه
عشان لو كان داق حاجة واحدة بس من دول .. و شاف البلد لسه زي ما هي.. ناس بتتقتل-بتتسجن-بتتخطف .. كانت عالاقل هاتصعب عليه نفسه عشان تعبها راح هدر
بس للاسف .. ناس كتير خافت انها تشارك في الثورة .. و دا مش عيب .. اكيد مش كلنا هانكون فرسان
اهو الناس اللي خافت دي في منهم اللي خوفه وصله انه يسب و يلعن فكل حاجة ليها دعوة بالثورة لمجرد انه ماقدرش يشارك فيها.
الناس دي جالهم الفرصة ينزلوا ميدان اللي هو (العباسية) و هيبقوا مؤيدين لقوة مسلحة اللي هي (المجلس العسكري) يعني لا في جمال هاتهجم ولا بلطجية هايرموا عليهم طوب من علي كوبري 6 اكتوبر
لأ و هايخدوا اعلام مصر ببلاش و حفلة و فقرات و صواريخ و عمرو مصطفي و هيصه
في ثوار احلي من كده ؟!!!
خمس محطات بس ......
توديك من ثورة و انتصار
لنكسة و انكسار
follow me at twitter
@mmohamedrefaat

زينات صدقي طلعت فلول !!

احلي حاجة لما تكون بتتكلم مع واحد في موضوع و انت في المترو ولا في الاتوبيس او حته في قهوة و تلاقي واحد سمع اخر جملة في كلامك و يدخل في الموضوع و يرد عليك , و تلاقي اللي جنبه بيسأله فايعيدله اللي انت قلتهوله و يبدأ كلامه بكلمة (بيقولك) و لو في واحد متابع الحوار و معاه مكالمة ممكن يحكي حكاية (بيقولك) للي بيكلمه.
عشان ماتقعش مني و نطلع بره الاتوبيس .... قصدي بره الموضوع
الحكاية دي بتفكرني بموقف حصلي , كنت راكب ميكروباص و بنتكلم انا و صاحبي (ربنا يهديه يا رب بيحب الفلول و الطعمية زي عنيه) و بحاول اقنعه بالصح.
وكان في واحد مركز معانا قوي لدرجة اني كنت هادفعله الاجرة من (فرط) العشم اللي بقي بينا و هو حاطط راسه بيني و بين صاحبي
المهم صحبي سألني سؤال فوسط ما كنا بنتناقش .. يعني ايام الثورة ماحصلش نهب و ناس اتخرب بيتها؟؟اكدب و قولي لأ بقي؟؟
قلتله لأ انا جوايا ((جينات صدقي)) بتقولك و بتعترف ان كان في عمليات سرقة و نهب
فجأة صاحبنا (اللي هو راسه بيني و بين صاحبي ) قال ايه؟!! مالها زينات صدقي؟؟ هي كمان طلعت فلول ؟؟
لا حول الله يا رب و اللي يشوفها في معبودة الجماهير مع الاستاذ عبد الحليم حافظ مايقولش عليها كده خالص (قالها و هو متأثر قوي)
فجأة اللي جنبه بيقوله خير ؟
قاله (بيقولك) زينات صدقي طلعت فلول و بتقول ان الثوار سرقوا و خربوا البلد
فـ رد عليه قاله و الله ست عندها حق دا البورصة بتخسر كل يوم يجي 10 مليار (قالها كأنه رئيس مجلس ادارة مصر المقاصة)
رد صاحبنا قاله بس لا مالهاش حق انها تقول كده عيب برده
و انقسم الميكروباص حول مؤيد و معارض للكلام اللي قالته زينات صدقي
و انا فوسط ده كله مش مصدق اللي بيحصل!!
و عرفت منين بس الاشاعات في بلدنا بتبدأ
و منين بس الشعب كله بقي محللين احوال سياسية اقتصادية فنية رياضية عسكرية ثانوية بنين و بنات
يعني اللي بيتكلموا دول لو فكروا ولو لثانية هايعرفوا ان زينات صدقي ماتت من زماااااااااااان
بس للأسف كتير في مصر بننسي اننا نفكر و بنعيد الكلام
لكن عـ الاقل خليك ... انسان مش بغبغان

القابضة هي السبب !!

سمعنا كتير ان 6 ابريل بتاخد تمويل خارجي و دولارات و ملايين و تدريبات و الخ الخ الخ .
ماحدش سأل نفسه اشمعنه حركة 6 ابريل هي بس اللي قالوا عليها انهم بيجيلهم فلوس من بره ؟؟؟
و بعدين اعضاء الحركة اللي سافروا اتدربوا بره خرجوا من مصر علي بساط الريح و لا من المطار ؟؟؟؟ خدوا ختم في جوازات السفر من المطار يعني , طب ماتقبضش عليهم ساعتها ليه؟؟ ولا هما افتكروا دلوقتي بس انهم سافروا اتدربوا بره ؟؟؟
اسئلة كتير اسألها لنفسك هاتحس ان في تلفيق (توفيق الدقن الله يرحمه قالها زمان : جرا ايه ياخويا؟؟)
بس انا هاجوبلك علي سؤال واحد بس, اشمعنا قالوا ان 6 ابريل قابضين من بره؟
السر في القابضة اللي في شعار الحركة , يعني زي ما النسر اللي في شعار الاهلي هو اللي بيخطف الدوري كل سنة و بيطير و السهم اللي في شعار الزمالك بيحاول يوقعوا برده كل سنة و مابيعرفش , فا حركة 6 ابريل حركة (قابضة) من بره عشان موجود في شعارها (قابضة) .
و الله الموفق و المستعان...

بلدنا شقة...ايجار جديد !!

الشقة..حلم ناس كتير في مصر , وياما ناس تعبوا و سافروا و في اللي سرقوا كمان عشان يبقي اسمه عنده (شقة)

طبعا لو انت من الناس المستريحين و اللي نايمين علي قرشين حلوين , فاهتكون عندك شقة تمليك .

اما بقي لو علي اد حالك شوية فا هاتبقي من رواد نادي ( سكان الايجار الجديد)

ماتزعلش ولا تشيل في قلبك .. دي حاجة جميلة جدا , علي الاقل تقدر تغير مكان سكنك كل فترة

و لو الشقة هاتتهد باللي فيها مثلا مش هاتشيل هم ماهي مش بتاعتك , لكن دي لو تمليك هاتسند السقف بأيديك ماهي شقتك بقي

الكارثة بقي ان في ناس فاهمة انهم ساكنين في مصر (ايجار جديد) .

عادي جدا عندهم انها يبقي فيها فساد بيشيل من (عمدان ) الشقة حبة حبة و يقولك ماحنا عايشين

لا انت غلطان . بلدك دي بتاعتك (تمليك يعني) , يمكن لو ماوقعتش علي دماغك النهاردة تقع علي دماغ ابنك او حفيدك بكرة

فاقول ورايا ..انا مصري (تمليك) مش (ايجار جديد)

كلام موزون

كلام من غير عنوان .... بس هاتفهمه :)

اضرب و البس درع و خوذه

و اضرب حبه كمان دخان

و اما بتيجي فوقت العوزة

ليه بنشوفك حد جبان

اللي اتكلم عاوز حقه

كنت واقفله تقول فرسان

و اللي اتكلم ظالم نفسه

حارسه محاوطه فكل مكان

هو حكايتك ايه يا نظام

حسك زيك زي زمان

ماتغيرتش ماتعلمتش

فيك ما واثقتش حتي كمان

..................

فاكر يا غبي اول مرة اتغبيت
مش في ابتدائي و لا فاعدادي
ولا لما قلبوا عليك البيت
ده من قريب لما خليت

الاغلبية تبقي صامته
و مشغلين وضع الهزاز
و مجلس عسكر شكله اونطه
حمانا قال..ومين دا اللي قال
ان احنا اصلا وش جواز

احنا شباب حب التغير
و حمانا يبقي اسمه النيل
و بنته مصر طالب ايديها
و يا عمي شاري و طبعي اصيل

فهمت يا غبي امتي اتغبيت
ولا اعيدلك تاني مانا شايف
جوه عيونك عيدلي ياريت!!

.....................


ناس مشغوله بالاصوات
و ناس مهمومه بالمصابين
افرح يا ناجح في انتخابات
بس سؤال..هاتبقي نايب فين و لمين؟؟
دنتا بلدك عايزه بلد
و البلد عايزه العرق
و العرق عند الجدع
و الجدع راح و اتسحل
و اترما بين الحيطان
تتقفل كل الببان
جاوب قولي ياللي نجحت
فين المجلس؟؟فين الشعب؟؟

.................


عارف !!
بكرة ممكن يكون الدور عليا او عليك
و يمكن كمان موتي يكون من بين ايديك
و يمكن كمان اخد لقب
بلطجي ماللي خربوا البلد
و يمكن كمان ابقي عميل
او جي كمان من اسرائيل
بس المهم
انك عارفني
صحبك اخوك ابنك يا نيل

................


احلق يا راجل منك له
شنبك و ريح عالكنبة
شايك سيجارتك
جرنال سعدتك
و ام البلدي عاللي جابها
شفت اللي عملوه الاعداء
دول فسوا عجلة الانتاج
و البرصة خسرت
و الاته قصرت
و سرقوا فزبة جارنا علاء
اللي احنا فيه وكسه كبيرة
مالناش غير في الكورة و السيما
و قال بلطجية
خيبة قوية
دالجهل فينا عادة قديمة

...............

اللفافة لا تزال في فمي

و لسه فقلبي يا بلدي همي

واللي راح عالارض دمي

بحر شالني لجنة خادني

و ذنبي...

اني اتخلقت ليا صوت

لو يتكتم ممكن اموت

و اديني مت لكن...

اتولد بعدي 100 الف صوت

.................

و لــــــــــــــسه الـــكلام مــــــاخلصشي .....

مـاتــقـفـل يـابـنـي الـشـبــاك !!

الحكاية كانت في يوم و انا رايح الجامعة
و بعد ما نزلت من المترو سليم و بكامل هدومي و شنطتي
وصلت موقف السبتية ( اللي هو ورا قسم الازبكية كفانا و كفاكم الله من شره )
المهم ماكانش في ولا ميكروباص و الناس كانت كتير جدا, و العبد لله متأخر و عندي محاضرة
و اذ بالفرج قادم من بعيييييد
ميني باص و طالعله راس من الشباك اليمين بتنادي ( حصري و ليلة القدر) و للي مايعرفش دول مكانين في 6 اكتوبر
كل اللي واقفين في الموقف بصوا لبعض بنظرات غريبة , و بدأ الماراثون .. كله بيجري و بيزق اللي جنبه, اللي كان جي هو و خطيبته بيزوقها و يجري, اللي جي و معاه شنطة بيرميها و يجري, اللي جي هو و مراته بتركب هي طبعا و ربنا معاه هو بقي.
و بما اني رايح لوحدي و ربنا مديلي حبة طول فربنا وفقني و عرفت اركب , وعشان الحاجة بتدعيلي دايما فا لاقيت كرسي فاضي كمان , 
وفجأة الميني باص اتحول لمظاهرة مليونية و كان شعار الجميع ( و النعمة هاركب).
المهم اتحركنا و كان في ناس واقفة مش عارفة انها تتنفس من الكتمة و الزحمة , و برغم برودة الهوا اللي داخل تكرم الشاب اللي قاعد جنبي و فتح الشباك عشان ماحدش يفطس .
و بدون اي مقدمات طلع صوت من ورايا سرعني انا شخصيا  بيقول : (ما تقفل يابني الشباك)
فرد الشاب ببرأة : حضرتك انا فاتحه علشان الناس مش عارفة تتنفس
قاله : و انا مالي انا الجو برد
الشاب قاله طب و الناس
رد بمنتهي البرود : وانا مال اهلي انا
ساعتها انا قلت بس دا الناس هايهبوا فيه و هايقلوله احنا عاوزين الشباك مفتوح
لكن لاقيت كله بيتفرج عادي
و مرة واحدة لاقيت الراجل ده عمل منعطف تاريخي محوري دائري رهيب و قال:
شباب ماشي باللي في دماغه , ماهو امثالك اللي ودو البلد في داهية
كان جوايا ساعتها لفظ سافل بس مسكت نفسي , و الشاب عشان محترم سكت و اكتفي بأبتسامة
بس صاحبنا زاد فيها , و كان بيشتم في كل حاجة ليها علاقة بالثورة
و فجأة ظهر شخص جديد , بس بصراحة عجبني , كان راجل ملتحي , قام و قال للشاب ماتقفلش الشباك و سيبه يهاتي مع نفسه
و من وراه كل الناس في نفس واحد : ايوة ماتقفلوش
عارفين اللي حصل في الاوتوبيس ده...
 بيحصل في كل مكان في مصر
كله بيفكر في نفسه
و اللي متاكل حقه مش بيقول لا , بالعكس بيقول لا للي عاوز يجيبله حقه , و يوم ما بيعمل شئ ايجابي بيكتفي انه مايشتمش الناس اللي هي اصلا بتجيب حقه
الثورة ماخربتش البلد, سعادتك ياللي عاوز تقفل الشباك ,,,, انت اللي خربت البلد